ഡി.എ., ഡി.ആർ കുടിശ്ശിക അനുവദിച്ച് ഉത്തരവ്

ഡി.എ., ഡി.ആർ കുടിശ്ശിക അനുവദിച്ച് ഉത്തരവ് തിരുവനന്തപുരം: സംസ്ഥാന സർക്കാർ ജീവനക്കാർക്കും ധ്യാപകർക്കും അനുവദിച്ചിരുന്ന ക്ഷാമബത്ത (ഡി.എ.)യ്ക്ക് മുൻകാല പ്രാബല്യം നൽകി കുടിശ്ശിക അനുവദിച്ച് സർക്കാർ ഉത്തരവിറക്കി. സർവീസ് പെൻഷൻകാർക്ക് ലഭിക്കേണ്ടിരുന്ന ക്ഷാമാശ്വാസ (ഡി.ആർ.) കുടിശ്ശികയും ഇതോടൊപ്പം അനുവദിച്ചിട്ടുണ്ട്. മുമ്പ് അനുവദിച്ച ഡി.എ., ഡി.ആർ. ഗഡുക്കൾക്ക് മുഴുവൻ മുൻകാല പ്രാബല്യം നൽകി കണക്കാക്കിയ കുടിശ്ശികയാണ് വിതരണം ചെയ്യുന്നത്. യു.ജി.സി., എ.ഐ.സി.ടി.ഇ., മെഡിക്കൽ എഡ്യുക്കേഷൻ സ്കീമുകളിൽ ഉൾപ്പെട്ട അധ്യാപകരും ഇതിന്റെ പരിധിയിൽ ഉൾപ്പെടും. സംസ്ഥാന സർക്കാർ ജീവനക്കാർക്കും പെൻഷൻകാർക്കും നൽകേണ്ട മുഴുവൻ ഡി.എ., ഡി.ആർ. ഗഡുക്കളും ഇതിനകം അനുവദിച്ചിട്ടുണ്ടെങ്കിലും, കുടിശ്ശിക ഘട്ടംഘട്ടമായി വിതരണം ചെയ്യുമെന്ന് ധനകാര്യ മന്ത്രി K. N. Balagopal ബജറ്റിൽ പ്രഖ്യാപിച്ചിരുന്നു. 2026–27 സാമ്പത്തിക വർഷത്തിൽ വിതരണം ചെയ്യേണ്ട കുടിശ്ശിക ഗഡുക്കൾക്കായുള്ള തുക ബജറ്റിൽ വകയിരുത്തിയിട്ടുണ്ട്. പതിനൊന്നാം ശമ്പള പരിഷ്കരണത്തിന്റെ ഭാഗമായി പ്രഖ്യാപിച്ച 7 ശതമാനം ക്ഷാമബത്ത 2021 ഏപ്രിൽ മാസത്തിലെ ശമ്പളത്തോടൊപ്പം വിതരണം ചെയ്തിരുന്നു. തുടർന്ന് അഞ്ച് തവണയായി ഓരോ ഗഡുവീതം ക്ഷാമബത്തയും തത്തുല്യമായ ക്ഷാമാശ്വാസവും അനുവദിച്ചു. കുടിശ്ശികയായിരുന്ന 13 ശതമാനം ക്ഷാമബത്തയും ക്ഷാമാശ്വാസവും ഈ വർഷം ഫെബ്രുവരി, മാർച്ച് മാസങ്ങളിലായി അനുവദിച്ചു. മുഴുവൻ ഡി.എ., ഡി.ആർ. ഗഡുക്കൾക്കും ബാധകമായ യഥാർത്ഥ കാലാവധി കണക്കാക്കി മുൻകാല പ്രാബല്യം നൽകി കുടിശ്ശിക അനുവദിച്ചാണ് സർക്കാർ ഉത്തരവ് പുറത്തിറക്കിയത്. വരുന്ന സാമ്പത്തിക വർഷം മുതൽ ഇത് എട്ട് ഗഡുക്കളായി വിതരണം ചെയ്യാനാണ് തീരുമാനം.